Korporativ idarəetmə bazası şəffaf və ədalətli bazarları, həmçinin resursların səmərəli bölüşdürülməsini təşviq etməlidir. O, qanunun aliliyinə uyğun olmalı və effektiv nəzarəti və icraetməni dəstəkləməlidir.

Effektiv korporativ idarəetmə bazar iştirakçılarının fərdi müqavilə münasibətlərini qurarkən etibar edə biləcəyi sağlam hüquqi, tənzimləyici və institusional bazanın olmasını tələb edir. Şəffaf və ədalətli bazarları təşviq etməklə, bu baza həmçinin daha geniş iqtisadi məqsədlərə nail olmaq üçün zəruri olan, bazarlara inamın gücləndirilməsində mühüm rol oynayır. Korporativ idarəetmə bazası adətən ölkənin spesifik şəraitinin, tarixinin və ənənəsinin nəticəsi olan qanunvericilik, tənzimləmə, listinq qaydaları, özünütənzimləmə tədbirləri, müqavilə öhdəlikləri, könüllü öhdəliklər və biznes təcrübələrinin elementlərindən ibarət olur. Buna görə də bu elementlər arasında arzu olunan elementlər qarışığı ölkədən ölkəyə dəyişəcək.

Korporativ idarəetmə bazasının qanunvericilik və tənzimləyici elementləri, çevikliyə imkan yaratmaq və ayrı-ayrı şirkətlərin xüsusiyyətlərini nəzərə almaq üçün çox vaxt “riayət et və ya izah et” prinsipinə əsaslanan korporativ idarəetmə kodeksləri kimi hüquq elementləri ilə faydalı şəkildə tamamlana bilər. Bir şirkət, bir investor və ya müəyyən bir maraqlı tərəf üçün uğurlu olan element, başqa kontekstdə və fərqli şəraitdə fəaliyyət göstərən korporasiyalar, investorlar və maraqlı tərəflər üçün münasib olmaya bilər. Beləliklə, konkret korporativ idarəetmə bazasının hər hansı xüsusi elementi bütün hallarda konkret idarəetmə məsələsinin həllində effektiv olmaya bilər. Əksinə, uğurlu korporativ idarəetmə təcrübələrini stimullaşdırmaq və ya tələb etmək üsulları yanaşmaların konkret şəraitə uyğunlaşdırılması ilə arzu olunan nəticələrə nail olmaq məqsədi daşımalıdır. Məsələn, müəyyən korporativ idarəetmə təcrübələrinin effektiv həyata keçirilməsinin təmin edilməsinin arzuolunan nəticəsi, institusional investorların qanun kodeksi tövsiyələrinə uyğun olaraq bu cür təcrübələrin təkmilləşdirilməsində güclü rol oynadığı bazarlarda daha səmərəli şəkildə əldə edilə biləcəyi halda, investorların daha passiv rolu öhdəsinə götürdüyü bazarlarda tənzimləyici orqan müəyyən korporativ idarəetmə standartlarının tətbiqini tələb etməyi və tətbiq etməyi seçə bilər. Yeni təcrübələr artdıqca və biznes şəraiti dəyişdikcə korporativ idarəetmə bazasının müxtəlif müddəaları nəzərdən keçirilməli və zərurət yarandıqda onlara düzəlişlər edilməlidir.

Prinsipləri həyata keçirməyə çalışan yurisdiksiyalar bazarın dürüstlüyünə, kapital bazarlarına çıxışa, iqtisadi göstəricilərə, şəffaf və müvafiq şəkildə işləyən bazarlara verdiyi töhfəni qoruyub saxlamaq və gücləndirmək məqsədi ilə öz korporativ idarəetmə bazalarına nəzarət etməlidirlər. Bunun bir hissəsi olaraq, korporativ idarəetmə bazasının müxtəlif elementləri arasında qarşılıqlı əlaqəni və tamamlamanı və onun etik, məsuliyyətli və şəffaf korporativ idarəetmə təcrübələrini təşviq etmək üçün ümumi qabiliyyətini nəzərə almaq vacibdir. Bu cür təhlil effektiv korporativ idarəetmə bazasının işlənib hazırlanması prosesində mühüm vasitədir. Bunun üçün ictimaiyyətlə səmərəli və vaxtında aparılan məsləhətləşmələr vacib elementdir. Bir sıra yurisdiksiyalarda bunun, şirkətləri və onların maraqlı tərəflərini sağlam korporativ idarəetmə təcrübələrinin tətbiqinin faydaları haqqında məlumatlandırmaq təşəbbüsləri ilə tamamlanması tələb oluna bilər.

Bundan əlavə, korporativ idarəetmə bazasını yaradarkən milli qanunvericilik orqanları və tənzimləyici qurumlar effektiv beynəlxalq dialoq və əməkdaşlığın zəruriliyini və nəticələrini nəzərə almalıdırlar. Bu şərtlər yerinə yetirilərsə, korporativ idarəetmə bazasının həddindən artıq tənzimləmədən qaçması, sahibkarlığın həyata keçirilməsini dəstəkləməsi və həm özəl sektorda, həm də dövlət qurumlarında maraqların toqquşması hallarının zərər vermə risklərini məhdudlaşdırması ehtimalı daha yüksəkdir.

I.A. Korporativ idarəetmə bazası onun maliyyə mənbələrinə korporativ çıxışına olan təsiri, ümumi iqtisadi göstəriciləri və maliyyə sabitliyini, korporasiyaların davamlılığını və dayanıqlılığını, bazarın dürüstlüyünü, onun bazar iştirakçıları üçün yaratdığı stimulları və şəffaf və müvafiq şəkildə işləyən bazarların təşviqini nəzərə almaqla hazırlanmalıdır.

Kapital bazarları şirkətlərə innovasiyalar yaratmağa və iqtisadi artımı dəstəkləməyə, habelə maliyyə mənbələrini səmərəli şəkildə diversifikasiya etməyə imkan verən vəsaitlərlə təmin edilməsində əsas rol oynayır. Səhm və istiqrazların maliyyələşdirilməsi həmçinin işçi qüvvəsi, kreditorlar və təchizatçılar qarşısında öhdəliklərini yerinə yetirərkən müvəqqəti tənəzzülləri aradan qaldırmaq üçün şirkətlərin davamlılığını dəstəkləyir. Siyasəti müəyyən edən orqanlar və tənzimləyici qurumlar korporativ idarəetmə bazasının bazar əsaslı maliyyələşdirməyə korporativ çıxışı necə təşviq edə və ona təsir edə biləcəyini nəzərdən keçirməlidir.

İqtisadi fəaliyyətin korporativ təşkili forması artım üçün güclü qüvvə kimi çıxış edir. Korporasiyaların fəaliyyət göstərdiyi tənzimləyici və hüquqi mühit buna görə də ümumi iqtisadi nəticələr üçün başlıca əhəmiyyət kəsb edir. Siyasəti müəyyən edən orqanlar, həmçinin olduqca fərqli şəraitlərdə fəaliyyət göstərən korporasiyaların ehtiyaclarını ödəməyə, dəyər yaratmaq üçün onların yeni imkanlarının yaradılmasına köməklik göstərməyə və resursların ən səmərəli istifadəsini müəyyən etməyə qadir olan bir bazanın yaradılmasına məsuliyyət daşıyırlar. Müvafiq hallarda, korporativ idarəetmə bazaları, xüsusən də açıq bazara çıxarılan şirkətlərin ölçüsü ilə bağlı proporsionallığa imkan verməlidir Çeviklik tələb edə biləcək digər amillərə şirkətin mülkiyyət və nəzarət strukturu, coğrafi mövqeyi, fəaliyyət sektorları və şirkətin inkişaf mərhələsi daxildir. Siyasəti müəyyən edən orqanlar diqqətlərini yekun iqtisadi nəticələrə yönəltməli və siyasət variantlarını nəzərdən keçirərkən məsələn, stimullaşdırma strukturları, özünütənzimləmə sistemlərinin səmərəliliyi baxımından bazarların fəaliyyətinə və maraqların toqquşmasının tənzimlənməsinə təsir edən əsas dəyişən tendensiyalara təsirin təhil edilməsini həyata keçirməli olacaqlar. Şəffaf və müvafiq şəkildə işləyən bazarlar bazar iştirakçılarının nizam-intizamına və hesabatlılığın artırılmasına xidmət edir.

I.B. Korporativ idarəetmə təcrübələrinə təsir edən hüquqi və tənzimləyici tələblər qanunun aliliyinə uyğun, şəffaf və icra edilə bilən olmalıdır. Korporativ idarəetmə kodeksləri şirkətlərin ən qabaqcıl təcrübələrinin yaradılmasını və təkamülünü dəstəkləmək üçün bir-birini tamamlayan mexanizm təklif edə bilər, bu şərtlə ki, onların statusu lazımi şəkildə müəyyən edilmiş olunsun.

Bazar qüsurlarının aşkar hallarını həll etmək üçün yeni qanun və qaydalara ehtiyac yaranarsa, onlar bütün tərəfləri əhatə edən səmərəli və bərabər şəkildə həyata keçirilməyə və tətbiq edilməyə imkan verəcək şəkildə tərtib edilməlidir. Hökumət və digər tənzimləyici orqanların korporasiyalar, onların təmsilçi təşkilatları, səhmdarlar və maraqlı tərəflərlə məsləhətləşmələri bunun effektiv üsuludur. Həmçinin, tərəflərin öz hüquqlarını qoruması üçün mexanizmlər yaradılmalıdır. Həddindən artıq tənzimləmə, tətbiq olunmayan qaydalar və biznes dinamikasına mane ola biləcək və ya onu pisləşdirə biləcək gözlənilməz nəticələrin qarşısını almaq üçün siyasət tədbirləri onların ümumi xərcləri və faydaları nəzərə alınmaqla tərtib edilməlidir.

Dövlət orqanları qeyri-dürüst davranışların qarşısını almaq və sağlam korporativ idarəetmə təcrübələrini təmin etmək üçün effektiv icraetmə və sanksiya müəyyən etmək səlahiyyətlərinə malik olmalıdırlar. Bundan əlavə, icraetmə şəxsi fəaliyyət vasitəsilə də həyata keçirilə bilər və dövlət və özəl subyektlər tərəfindən icraetmə prosesi arasında effektiv balans hər bir yurisdiksiyanın spesifik xüsusiyyətlərindən asılı olaraq dəyişəcəkdir.

Korporativ idarəetmə, həmçinin məqsədləri ümumiyyətlə qanun və ya norma statusuna malik olmayan kodeks və standartların tərkibində formalaşdırılır. Bu cür kodekslərdə tövsiyə olunan uğurlu təcrübələr adətən “riayət et və ya izah et” açıqlama mexanizmləri və ya “tətbiq et və/və ya izah et” kimi digər variasiyalar vasitəsilə təşviq olunur. Bu cür kodekslər korporativ idarəetmə tədbirlərinin və təcrübələrinin təkmilləşdirilməsində mühüm rol oynasa da, onlar səhmdarları və maraqlı tərəfləri onların statusu və tətbiqi ilə bağlı qeyri-müəyyənlikdə qoya bilər. Kodekslər və prinsiplər milli standart kimi və ya hüquqi və ya tənzimləyici müddəalara əlavə kimi istifadə edildikdə, bazarın etibarlılığı onların əhatə dairəsi, tətbiqi, uyğunluğu və sanksiyaları baxımından statusunun aydın şəkildə göstərilməsini tələb edir.

I.C. Müxtəlif səlahiyyətli orqanlar və özünüidarəetmə orqanları arasında vəzifə bölgüsü aydın şəkildə ifadə edilməli və ictimai maraqlara xidmət etməlidir.

Korporativ idarəetmə tələblərinə və təcrübələrinə adətən şirkətlərin fəaliyyətini tənimləyən qanunlar, qiymətli kağızların tənzimlənməsi, mühasibat uçotu və audit standartları, listinq qaydaları, müflisləşmə haqqında qanun, müqavilə hüququ, əmək hüququ, vergi hüququ, eləcə də potensial beynəlxalq hüquq kimi bir sıra hüquq sahələri təsir edir. Ayrı-ayrı şirkətlərin korporativ idarəetmə təcrübələrinə də çox vaxt insan hüquqları və ətraf mühit haqqında qanunlar və getdikcə daha çox rəqəmsal təhlükəsizlik, məlumatların məxfiliyi və şəxsi məlumatların qorunması ilə bağlı qanunlar təsir edir. Bu şəraitdə hüquqi təsirlərin müxtəlifliyinin təsadüfi üst-üstə düşmə halları və hətta münaqişələrə səbəb ola bilməsi riski var ki, bu da əsas korporativ idarəetmə məqsədlərinə nail olmaq qabiliyyətini poza bilər. Siyasəti müəyyən edən orqanların bu riskdən xəbərdar olması və ardıcıl və sabit institusional və tənzimləyici bazanı təmin etmək üçün tədbirlər görməsi vacibdir. Səmərəli icraetmə həm də müxtəlif orqanlar arasında nəzarət, həyata keçirmə və icraetməyə dair öhdəliklərinin bölüşdürülməsinin aydın şəkildə müəyyən edilməsini və rəsmiləşdirilməsini tələb edir ki, nəticədə bir-birini tamamlayan orqan və qurumların səlahiyyətlərinə hörmət edilsin və onlardan ən səmərəli şəkildə istifadə edilsin. Potensial ziddiyyətli məqsədlərin, məsələn, eyni quruma biznesi cəlb etmək və pozuntulara görə sanksiya tətbiq etmək tapşırığı verildiyi halların qarşısı aydın idarəetmə müddəaları vasitəsilə alınmalı və ya idarə edilməlidir. Yurisdiksiyalar arasında üst-üstə düşən və bəlkə də ziddiyyətli normalar də tənzimləyici arbitrajın qarşısını almaq və heç bir tənzimləyici boşluğun yaranmasına imkan verməmək (yəni heç bir orqanın açıq-aşkar məsuliyyət daşımadığı məsələlər) və eləcə də çoxsaylı sistemlərə uyğunluğu təmin etmək məqsədilə xərcləri minimuma endirmək üçün nəzarət edilməli olan bir məsələdir.

Tənzimləyici öhdəliklər və ya nəzarət qeyri-dövlət qurumlarına, xüsusən də fond birjalarına həvalə edildikdə, belə bir səlahiyyətin niyə və hansı şəraitdə verilməsinin məqsədəuyğun olduğunu açıq şəkildə qiymətləndirmək arzuolunan hesab edilir. Bundan əlavə, dövlət orqanı həvalə edilmiş səlahiyyətlərin ədalətli, ardıcıl və qanuna uyğun şəkildə tətbiq edilməsini təmin etmək üçün effektiv təminatlara malik olmalıdır. Həmçinin, hər hansı belə səlahiyyət verilmiş qurumun idarəetmə strukturunun şəffaf olması və potensial maraqların toqquşmasını həll etmək üçün müvafiq təminatlar daxil olmaqla, ictimai maraqları əhatə etməsi vacibdir.

I.D. Fond bazarının tənzimlənməsi effektiv korporativ idarəetməni dəstəkləməlidir.

Fond bazarları, listinqə daxil edilmiş emitentlər tərəfindən effektiv korporativ idarəetməni təşviq edən tələblərin müəyyən edilməsi və həyata keçirilməsi ilə korporativ idarəetmənin təkmilləşdirilməsində əhəmiyyətli rol oynaya bilər. Həmçinin, fond bazarları investorların müvafiq olaraq emitentin qiymətli kağızlarını almaq və ya satmaq imkanı verməklə müvafiq emitentin idarəçiliyinə maraq və ya maraqsızlıq ifadə edə biləcəyi imkanlar təqdim edir. Birjaların listinqə daxil edilməsi və onların imkanları vasitəsi ilə ticarətin idarə edilməsi qaydalarının keyfiyyəti buna görə də korporativ idarəetmə bazasının mühüm elementidir.

Ənənəvi olaraq “fond birjaları” adlanan məfhum bu gün müxtəlif forma və şəkillərdə mövcuddur. İri fond birjalarının əksəriyyəti indi mənfəəti maksimuma çatdıran və özləri də digər mənfəəti artıran birjalar və ticarət mərkəzləri ilə rəqabətdə fəaliyyət göstərən, açıq bazara çıxarılan səhmdar cəmiyyətləridir. Fond bazarının konkret strukturundan asılı olmayaraq, siyasəti müəyyən edən orqanlar və tənzimləyici qurumlar standartların müəyyən edilməsi, nəzarət və korporativ idarəetmə qaydalarının həyata keçirilməsi baxımından birjaların və ticarət mərkəzlərinin düzgün rolunu qiymətləndirməlidirlər. Bu, fond birjalarının konkret biznes modellərinin bu funksiyaları yerinə yetirmək üçün stimullara və qabiliyyətlərə necə təsir etdiyinin təhlil edilməsini tələb edir.

I.E. Nəzarət, tənzimləmə və icraçı orqanlar öz vəzifələrini peşəkar və obyektiv şəkildə yerinə yetirmələri üçün səlahiyyətə, müstəqilliyə, toxunulmazlığa, resurslara və imkanlara malik olmalıdırlar. Üstəlik, onların normativ aktları vaxtında təsdiq edilməli, şəffaf olmalı və tam şəkildə izah edilməlidir.

Nəzarət, tənzimləmə və icraetmə, öz funksiyalarını və vəzifələrini yerinə yetirməkdə fəaliyyət baxımından müstəqil və məsuliyyətli, adekvat səlahiyyətlərə, lazımi resurslara və öz funksiyalarını yerinə yetirmək və səlahiyyətlərini həyata keçirmək qabiliyyətinə malik olan, o cümlədən korporativ idarəetmə ilə bağlı səlahiyyətlərə malik olan orqanlara həvalə edilməlidir. Bir çox yurisdiksiyalar qiymətli kağızlara nəzarət edən orqanın siyasi müstəqilliyi məsələsini üzvlərinə müəyyən təyinat müddətləri verilən formal idarəetmə orqanının (idarə heyəti, şura və ya komissiya) yaradılması yolu ilə həll etmişdir. Bəzi yurisdiksiyalar, həmçinin müstəqilliyi daha da artırmaq üçün təyinatları pilləli şəkildə edir və onları siyasi təqvimdən müstəqil edir. Bəzi yurisdiksiyalar məcburi vaxt boşluqları və ya düşünmə və danışıqlar dövrləri vasitəsilə əmək fəaliyyətinin başa çatdırılmasından sonra sənayeyə keçidi məhdudlaşdıran siyasətlər tətbiq etməklə potensial maraq toqquşmalarını azaltmağa çalışırlar. Bu cür məhdudiyyətlər müəyyən edilərkən tənzimləyici orqanın müvafiq təcrübəyə malik yüksək səviyyəli heyəti cəlb etmək imkanları nəzərə alınmalıdır. Bu orqanlar öz funksiyalarını maraqların toqquşmasına yol vermədən yerinə yetirə bilməli və onların qərarlarına məhkəmə və ya inzibati qaydada baxılmalıdır. Eyni zamanda, nəzarətedici heyət öz vəzifələrini vicdanla yerinə yetirərkən törətdikləri hərəkətlərin və (və ya) hərəkətsizliyin müdafiəsi ilə bağlı xərclərdən adekvat şəkildə azad edilməlidirlər.

Maraqların toqquşmasından (o cümlədən nəzarət və icra proseslərinə siyasi və ya biznes müdaxiləsi potensialından) yayınmaq üçün əməliyyat müstəqilliyi büdcə və insan resurslarının idarə edilməsi qərarları üzərində müstəqilliklə gücləndirilə bilər. Bu cür müstəqillik yüksək etik standartlar və hesabatlılıq mexanizmləri, o cümlədən ictimai və məhkəmə nəzarəti üçün açıq olan vaxtında verilmiş, şəffaf və tam izah edilmiş qərarlarla birləşdirilməlidir. Korporativ hadisələrin sayı və açıqlamaların həcmi artdıqda, nəzarət, tənzimləyici və icraetmə orqanlarının resursları gərginliyə məruz qala bilər. Nəticə etibarı ilə, onların effektiv nəzarəti və təhqiqat qabiliyyətini təmin etmək üçün tam ixtisaslı işçilərə əhəmiyyətli tələbatı olacaq ki, bu da adekvat maliyyə vəsaiti tələb edir. Bir çox yurisdiksiyalar dövlət maliyyələşdirməsi ilə birlikdə və ya onlara alternativ olaraq nəzarət edilən qurumlara rüsumlar tətbiq edir. Nəzarət edilən sənaye iştirakçılarından ayrı nəzarət müstəqilliyinə mane olmamaq üçün bu cür rüsumların strukturkaşdırılması və rüsumları müəyyən etmək üçün qəbul edilmiş meyarlar üzrə adekvat şəffaflığın təmin edilməsi fonunda bu, öz səlahiyyətlərini yerin yetirmək üçün hökumətlərdən ayrı daha geniş maliyyə müstəqiliyini təmin edə bilər. Rəqabətli şərtlərlə işçi heyəti cəlb etmək qabiliyyəti, həmçinin nəzarətin və icraetmənin keyfiyyətini və müstəqilliyini artırmaq üçün vacibdir.

I.F. Rəqəmsal texnologiyalar korporativ idarəetmə tələblərinə nəzarəti və tətbiqi gücləndirə bilər, lakin nəzarətedici və tənzimləyici orqanlar əlaqəli risklərin idarə edilməsinə lazımi diqqət yetirməlidirlər.

Bir çox yurisdiksiyalar korporativ idarəetmə ilə bağlı nəzarət və icraetmə proseslərinin məsələn, bazarın dürüstlüyü üçün, səmərəliliyi və effektivliyini artırmaq üçün rəqəmsal texnologiyalardan istifadə edir. Onlar həmçinin tənzimlənən qurumlar üzərindəki tənzimləmə yükünü yüngülləşdirə bilər ki, həmin qurumlar özləri uyğunluq xərclərini azaltmaq və risklərin idarə edilməsi imkanlarını artırmaq üçün rəqəmsal vasitələrdən istifadə edə bilərlər. Rəqəmsal texnologiyalardan, həmçinin, korporativ idarəetmənin tənzimlənməsinin ciddiliyini və əhatə dairəsini qorumaq və mövcud bazanın fəaliyyətində təkmilləşdirmələr vasitəsilə korporativ məlumatların açıqlanması məqsədi ilə tənzimləmə qaydalarına uyğunluğu şirkətlər üçün daha az ağır etmək üçün istifadə edilə bilər.

Tənzimləmə və nəzarət proseslərində rəqəmsal həllərin qəbulu həmçinin çətinliklər və risklərlə müşayiət olunur. Nəzərə alınmalı olan mühüm məqamlara məlumatların keyfiyyətinin təmin edilməsi; işçilərin müvafiq texniki səriştəyə malik olmasının təmin edilməsi; hesabat formatlarının işlənib hazırlanmasında sistemlər arasında qarşılıqlı fəaliyyətin nəzərə alınması; və üçüncü tərəflərdən asılılıq hallarının və rəqəmsal təhlükəsizlik risklərinin idarə edilməsi daxildir. Nəzarət proseslərində süni intellekt və alqoritmik qərarların qəbulu istifadə edildikdə, alqoritmik modellərə mövcud qərəzlərin daxil edilməsi risklərini və modellərə və rəqəmsal texnologiyalara həddən artıq asılılıqdan yaranan riskləri azaltmaq üçün insan elementinin saxlanması olduqca vacib şərtdir.

Eyni zamanda, əksər yurisdiksiyalarda tənzimləyici qurumlar innovasiyalara və alternativ texnoloji həllərin qəbuluna mane olmayan texnologiyaya neytral yanaşmanın dəyərini müdafiə edirlər. Texnologiyalar inkişaf etdikcə və korporativ idarəetmə təcrübələrini gücləndirməyə xidmət edə bildikcə, tənzimləyici baza onlardan istifadəni asanlaşdırmaq üçün təkrar baxış və düzəlişlər tələb edə bilər.

I.G. Transsərhəd əməkdaşlıq, həmçinin məlumat mübadiləsi üçün ikitərəfli və çoxtərəfli razılaşmalar vasitəsilə genişləndirilməlidir.

Yüksək səviyyəli transsərhəd sahibkarlıq və ticarət tənzimləyicilər arasında güclü beynəlxalq əməkdaşlıq, o cümlədən məlumat mübadiləsi üçün ikitərəfli və çoxtərəfli razılaşmalar və ya birgə nəzarət tədbirləri tələb edir. Beynəlxalq əməkdaşlıq korporativ idarəetmə üçün getdikcə daha çox aktuallaşır, xüsusən şirkətlər və ya şirkət qrupları bir çox yurisdiksiyalarda həm listinqə daxil edilmiş, həm də listinqə daxil edilməmiş qurumlar vasitəsilə fəal olduqda və müxtəlif yurisdiksiyalardakı birjalarda bir neçə fond bazarı siyahıları axtardıqda.

I.H. Aydın tənzimləyici bazalar şirkət qrupları daxilində səhmləri açıq şəkildə bazara çıxarılan şirkətlərə effektiv nəzarəti təmin etməlidir.

Adekvat korporativ idarəetmə bazaları əsasında fəaliyyət göstərən, müvafiq şəkildə idarə olunan şirkət qrupları kütləvi istehsal hesabına qiymətlərin aşağı salınması, sinergiya və digər səmərəlilik əsasında fayda əldə etməyə kömək edə bilər. Buna baxmayaraq, şirkət qrupları bəzi hallarda səhmdarlara və maraqlı tərəflərə münasibətdə ədalətsiz rəftar riskləri ilə əlaqələndirilə bilər. Buna görə də bir çox yurisdiksiyalarda şirkət qruplarının yayılması korporativ idarəetmə bazasının onlara effektiv şəkildə nəzarət etmək üçün vasitələr təqdim etməsini təmin etmək üçün tənzimləyici qurumlara ehtiyacı artırdı. Əks təqdirdə, şirkət qruplarının geniş və mürəkkəb strukturları, qrup strukturları daxilində açıq şəkildə satışa çıxarılan ana və ya törəmə şirkətlərin səhmdarları və maraqlı tərəfləri üçün, o cümlədən sui-istifadə edən əlaqəli tərəflərlə əməliyyatlar vasitəsilə risklər yarada bilər. Bəzi qrup şirkətləri, həmçinin qrupun vergi planlaşdırma strategiyalarının bir hissəsi kimi qrup daxilində vəsaitlərin köçürülməsi üçün istifadə edilə bilər və ya fondlardan idarə heyətinin/icraçı şəxslərin mükafatlandırılması və ya dividend ödənişləri üçün istifadə edə bilər.

Müxtəlif sektorlarda və sərhədlərdən kənarda fəaliyyət göstərən şirkət qrupları tənzimləyici nəzarətin effektivliyini və ardıcıllığını gücləndirmək üçün yerli tənzimləyici qurumlar və yurisdiksiyalar arasında əməkdaşlığa ehtiyac dururlar. Bu cür səylərə nəzarət və icraetmə məqsədləri üçün şirkət qruplarının fəaliyyəti haqqında məlumat mübadiləsi daxil ola bilər. Bu məqsədlə yurisdiksiyalar digər aspektlərlə yanaşı, qrup şirkətləri və onların əsas müəssisələrinin nəzarət əlaqələri, şirkətlərin qeydiyyatda olduğu yer və konsolidə olunmuş maliyyə hesabatlarına daxil edilmənin məqsədəuyğunluğu kimi aspektlərə diqqət yetirməklə şirkət qruplarına nəzarət üçün praktiki anlayış və meyarlar hazırlamağa təşviq edilir. Bəzi yurisdiksiyalarda şirkətlər qrup fəaliyyətinin özünü-tənzimləmə vasitəsi kimi qrup səviyyəsində protokollar və idarəetmə qaydaları qəbul etmişlər.